Amo 9 | CopSahBible2 | STEP | ⲁⲓⲛⲁⲩ ⲉⲡϫⲟⲉⲓⲥ ⲉϥⲁϩⲉⲣⲁⲧϥ ϩⲓϫⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲁⲩⲱ ⲡⲉϫⲁϥ ϫⲉ ϩⲓⲟⲩⲉ ⲉϫⲙ ⲡϩⲓⲗⲁⲥⲧⲏⲣⲓⲟⲛ ⲛⲧⲁⲣⲟⲩⲛⲟⲉⲓⲛ ⲛϭⲓ ⲡⲏⲗⲏ ⲉⲧϩⲓⲃⲟⲗ ⲛⲅϩⲓⲟⲩⲉ ⲉϫⲛ ⲧⲁⲡⲏ ⲛⲟⲩⲟⲛ ⲛⲓⲙ ⲁⲩⲱ ⲛⲉⲩⲕⲉⲥⲉⲉⲡⲉ ϯⲛⲁⲙⲟⲟⲩⲧⲟⲩ ϩⲛ ⲧⲥⲏϥⲉ ⲛⲧⲉⲧⲙ ⲗⲁⲁⲩ ⲣ ⲃⲟⲗ ⲛϩⲏⲧⲟⲩ ⲟⲩⲇⲉ ⲛⲧⲙ ⲗⲁⲁⲩ ⲟⲩϫⲁⲓ ⲛⲁⲩ

Amos 9

1 ⲁⲓⲛⲁⲩ ⲉⲡϫⲟⲉⲓⲥ ⲉϥⲁϩⲉⲣⲁⲧϥ ϩⲓϫⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲁⲩⲱ ⲡⲉϫⲁϥ ϫⲉ ϩⲓⲟⲩⲉ ⲉϫⲙ ⲡϩⲓⲗⲁⲥⲧⲏⲣⲓⲟⲛ ⲛⲧⲁⲣⲟⲩⲛⲟⲉⲓⲛ ⲛϭⲓ ⲡⲏⲗⲏ ⲉⲧϩⲓⲃⲟⲗ ⲛⲅϩⲓⲟⲩⲉ ⲉϫⲛ ⲧⲁⲡⲏ ⲛⲟⲩⲟⲛ ⲛⲓⲙ ⲁⲩⲱ ⲛⲉⲩⲕⲉⲥⲉⲉⲡⲉ ϯⲛⲁⲙⲟⲟⲩⲧⲟⲩ ϩⲛ ⲧⲥⲏϥⲉ ⲛⲧⲉⲧⲙ ⲗⲁⲁⲩ ⲣ ⲃⲟⲗ ⲛϩⲏⲧⲟⲩ ⲟⲩⲇⲉ ⲛⲧⲙ ⲗⲁⲁⲩ ⲟⲩϫⲁⲓ ⲛⲁⲩ 2 ⲉⲩϣⲁⲛⲃⲱⲕ ⲉϩⲣⲁⲓ ⲉⲧⲡⲉ ϯⲛⲁⲛⲧⲟⲩ ⲉⲡⲉⲥⲏⲧ ⲉⲃⲟⲗϩⲙ ⲡⲙⲁ ⲉⲧⲙⲙⲁⲩ ⲉⲩϣⲁⲛⲃⲱⲕ ⲉⲡⲉⲥⲏⲧ ⲉⲁⲙⲛⲧⲉ ⲧⲁϭⲓϫ ⲛⲁⲧⲟⲕⲙⲟⲩ ⲉϩⲣⲁⲓ ⲉⲃⲟⲗϩⲙ ⲡⲙⲁ ⲉⲧⲙⲙⲁⲩ 3 ⲉⲩϣⲁⲛϩⲟⲡⲟⲩ ϩⲙ ⲡϫⲱϥ ⲙⲡⲕⲁⲣⲙⲏⲗⲟⲥ ϯⲛⲁϯ ⲟⲩⲟⲓ ⲛⲥⲱⲟⲩ ϩⲙ ⲡⲙⲁ ⲉⲧⲙⲙⲁⲩ ⲧⲁⲛⲧⲟⲩ ⲉⲃⲟⲗ ⲉⲩϣⲁⲛϩⲱⲡⲟⲩ ⲙⲡⲙⲧⲟ ⲉⲃⲟ[ⲗ] ⲛⲛⲁⲃⲁⲗ ⲉϩⲣⲁⲓ ⲛⲛⲉⲧϣⲏⲕ ⲛ[ⲑⲁ]ⲗⲁⲥⲥⲁ ϯⲛⲁϩⲱⲛ ⲙⲡⲙⲁⲉ ⲉⲧⲙⲙⲁⲩ ⲉⲧⲟⲟⲧϥ ⲙⲡⲉⲇⲣⲁⲕⲱⲛ ⲛϥⲗⲟⲕⲥⲟⲩ 4 ⲁⲩⲱ ⲉⲩϣⲁⲛⲙⲟⲟϣⲉ ϩⲛ ⲟⲩⲁⲓⲭⲙⲁⲗⲱⲥⲓⲁ ϩⲓ ϩⲏ ⲛⲛⲉⲩϫⲓϫⲉⲉⲩ ϯⲛⲁϩⲱⲛ ⲙⲡⲙⲁ ⲉⲧⲙⲙⲁⲩ ⲉⲧⲟⲟⲧⲥ ⲛⲧⲥⲩϥⲉ ⲛⲥⲙⲟⲟⲩⲧⲟⲩ ⲁⲩⲱ ϯⲛⲁⲧⲁϫⲣⲉ ⲛⲁⲃⲁⲗ ⲉϩⲣⲁⲓ ⲉϫⲱⲟⲩ ⲉϩⲉⲛⲡⲉⲑⲟⲟⲩ ⲁⲩⲱ ⲉϩⲉⲛⲡⲉⲧⲛⲁⲛⲟⲩⲟⲩ ⲁⲛ 5 ⲁⲩⲱ ⲡⲉϫⲉ ⲡϫⲟⲉⲓⲥ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ ⲡⲉⲧϫⲱϩ ⲉⲡⲕⲁϩ ⲉⲧⲣⲉϥⲛⲟⲉⲓⲛ ϫⲉ ⲥⲉⲛⲁⲣϩⲏⲃⲉ ⲧⲏⲣⲟⲩ ⲛϭⲓ ⲛⲉⲩⲧⲟⲩⲏϩ ⲛϩⲏⲧϥ ⲁⲩⲱ ⲧⲉϥϩⲁⲏ ⲥⲛⲁⲉⲓ ⲉϩⲣⲁⲓ ⲛⲑⲉ ⲛⲟⲩⲉⲓⲉⲣⲟ ⲁⲩⲱ ⲥⲛⲁⲉⲓ ⲉⲡⲉⲥⲏⲧ ⲛⲑⲉ ⲙⲡⲓⲉⲣⲟ ⲛⲕⲏⲙⲉ 6 ⲡⲉⲧⲕⲱⲧ ϩⲛ ⲧⲡⲉ ⲙⲡⲉϥⲙⲁ ⲛⲃⲱⲕ ⲉϩⲣⲁⲓ ⲁⲩⲱ ⲡⲉϥⲉⲣⲏⲧ [ⲁϥⲥ]ⲙⲛⲥⲛⲧⲉ ⲙⲙⲟϥ ϩⲓϫⲙ ⲡⲕⲁϩ ⲡⲉⲧⲙⲟⲩⲧⲉ ⲉⲡⲙⲟⲟⲩ ⲛⲑⲁⲗⲁⲥⲥⲁ ⲁⲩⲱ ⲉϥⲡⲱϩⲧ ⲙⲙⲟϥ ⲉϫⲙ ⲡϩⲟ ⲙⲡⲕⲁϩ ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲡⲉ ⲡⲉϥⲣⲁⲛ 7 ⲛϣⲏⲣⲉ ⲙⲡⲓ︤ⲏ︦ⲗ︥ ⲙⲏ ⲛⲉⲧⲉⲧⲛϣⲟⲟⲡ ⲛⲁⲓ ⲁⲛ ⲛⲑⲉ ⲛⲛϣⲏⲣⲉ ⲛⲛⲉϭⲟⲟϣ ⲡⲉϫⲉ ⲡϫⲟⲉⲓⲥ ⲛⲡⲓ︤ⲏ︦ⲗ︥ ⲛⲧⲁⲓⲛⲧϥ ⲁⲛ ⲉⲃⲟⲗϩⲛ ⲕⲏⲙⲉ ⲁⲩⲱ ⲛⲁⲗⲗⲟⲫⲩⲗⲟⲥ ⲉⲃⲟⲗϩⲛ ⲧⲕⲁⲡⲡⲁⲇⲟⲕⲓⲁ ⲁⲩⲱ ⲛⲥⲩⲣⲟⲥ ⲉⲃⲟⲗϩⲛ ⲕⲉⲉⲓⲣⲁ 8 ⲉⲓⲥ ⲛⲃⲁⲗ ⲙⲡϫⲟⲉⲓⲥ ϭⲱϣⲧ ⲉϫⲛ ⲧⲙⲛⲧⲣⲟ ⲛⲛⲣϥⲣⲛⲟⲃⲉ ⲁⲩⲱ ϯⲛⲁϥⲓⲧⲟⲩ ⲉⲃⲟⲗ ϩⲓϫⲙ ⲡϩⲟ ⲙⲡⲕⲁϩ ⲡⲗⲏⲛ ⲛϯⲛⲁϥⲓ ⲁⲛ ⲙⲙⲁⲩ ⲉⲡⲧⲏⲣϥ ⲙⲡⲏⲓ ⲛⲓⲁⲕⲱⲃ ⲡⲉϫⲉ ⲡϫⲟⲉⲓⲥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲟⲩⲉϩⲥⲁϩⲛⲉ 9 ⲁⲩⲱ ϯⲛⲁⲧⲃⲃⲟ ⲛⲛϩⲉⲑⲛⲟⲥ ⲧⲏⲣⲟⲩ ⲙⲡⲓ︤ⲏ︦ⲗ︥ ⲙⲡⲉⲥⲙⲟⲧ ⲉϣⲁⲩⲧⲃⲃⲟ ⲙⲡϩⲁⲧ ⲛⲧⲉⲧⲙ ⲗⲁⲁⲩ ⲛϩⲏⲧⲟⲩ ⲧⲁⲕⲟ ϩⲓϫⲙ ⲡⲕⲁϩ 10 ⲥⲉⲛⲁⲙⲟⲩ ϩⲛ ⲟⲩⲥⲏϥⲉ ⲛϭⲓ ⲛⲣϥⲣⲛⲟⲃⲉ ⲧⲏⲣⲟⲩ ⲙⲡⲗⲁⲟⲥ ⲡⲉⲧϫⲱ ⲙⲙⲟⲥ ϫⲉ ⲛⲛⲉⲩϩⲱⲛ ⲉⲣⲟⲛ ⲛϭⲓ ⲙⲡⲉⲑⲟⲟⲩ ⲟⲩⲇⲉ ⲛⲛⲉⲩⲉⲓ ϩⲓⲱⲱⲛ 11 ϩⲙ ⲡⲉϩⲟⲟⲩ ⲉⲧⲙⲙⲁⲩ ϯⲛⲁⲧⲁϩⲟ ⲉⲣⲁⲧⲥ ⲛⲧⲉⲥⲕⲏⲛⲏ ⲛⲇⲁⲩⲉⲓⲇ ⲧⲉⲛⲧⲁⲥϩⲉ ⲉϩⲣⲁⲓ ⲁⲩⲱ ϯⲛⲁⲕⲱⲧ ⲛⲛⲉⲛⲧⲁⲩϩⲉ ⲉϩⲣⲁⲓ ⲛϩⲏⲧⲥ ⲁⲩⲱ ⲛⲉⲛⲧⲁⲩϣⲣϣⲱⲣⲟⲩ ⲛⲧⲁⲥ ϯⲛⲁⲧⲁϩⲟⲟⲩ ⲉⲣⲁⲧⲟⲩ ⲁⲩⲱ ϯⲛⲁⲕⲟⲧⲥ ⲛⲑⲉ ⲛⲉϩⲟⲟⲩ ⲙⲡⲁⲓⲱⲛ 12 ϫⲉⲕⲁⲥ ⲉⲩⲉϣⲓⲛⲉ ⲛϭⲓ ⲛϣⲱϫⲡ ⲛⲛⲣⲱⲙⲉ ⲙⲛ ⲛϩⲉⲑⲛⲟⲥ ⲧⲏⲣⲟⲩ ⲛⲧⲁⲩⲉⲡⲓⲕⲁⲗⲉⲓ ⲙⲡⲁⲣⲁⲛ ⲉϩⲣⲁⲓ ⲉϫⲱⲟⲩ ⲡⲉϫⲉ ⲡϫⲟⲉⲓⲥ ⲡⲉⲧⲉⲓⲣⲉ ⲛⲛⲁⲓ 13 ⲉⲓⲥ ϩⲉⲛϩⲟⲟⲩ ⲥⲉⲛⲏⲩ ⲡⲉϫⲉ ⲡϫⲟⲉⲓⲥ ⲛⲧⲉ ⲡⲱϩⲥ ⲧⲁϩⲉ ⲡϫⲱⲱⲗⲉ ⲁⲩⲱ ⲡⲉⲗⲟⲟⲗⲉ ⲛⲁⲡⲱϩ ⲙⲡⲥⲏⲩ ⲙⲡϫⲟ ⲁⲩⲱ ⲛⲧⲟⲩⲉⲓⲏ ⲥⲉⲛⲁϣⲟⲩⲟ ⲉⲃⲟⲗ ⲛⲟⲩϩⲗⲟϭ ⲛⲧⲉ ⲛⲃⲟⲩⲛⲟⲥ ⲧⲏⲣⲟⲩ ⲣⲱⲧ ⲛϣⲏⲛ 14 ⲁⲩⲱ ϯⲛⲁⲕⲧⲟ ⲛⲧⲁⲓⲭⲙⲁⲗⲱⲥⲓⲁ ⲙⲡⲁⲗⲁⲟⲥ ⲡⲓ︤ⲏ︦ⲗ︥ ⲛⲥⲉⲕⲱⲧ ⲛⲙⲡⲟⲗⲓⲥ ⲛⲧⲁⲩⲧⲁⲕⲟⲟⲩ ⲛⲥⲉⲟⲩⲱϩ ⲛϩⲏⲧⲟⲩ ⲛⲥⲉⲧⲱϭⲉ ⲛϩⲉⲛⲙⲁ ⲛⲉⲗⲟⲟⲗⲉ ⲛⲥⲉⲥⲉ ⲡⲉⲩⲏⲣⲡ ⲛⲥⲉϫⲟ ⲛϩⲉⲛϣⲛⲏ ⲛⲥⲉⲟⲩⲱⲙ ⲙⲡⲉⲩⲕⲁⲣⲡⲟⲥ 15 ⲁⲩⲱ ϯⲛⲁⲧⲟϭⲟⲩ ϩⲓϫⲙ ⲡⲉⲩⲕⲁϩ ⲛⲥⲉⲧⲙⲡⲟⲟⲛⲟⲩ ⲉⲃⲟⲗ ϫⲓⲛ ⲡⲉⲓⲛⲁⲩ ⲉⲃⲟⲗϩⲙ ⲡⲉⲩⲕⲁϩ ⲡⲁⲓ ⲛⲧⲁⲓⲧⲁⲁϥ ⲛⲁⲩ ⲡⲉϫⲉ ⲡϫⲟⲉⲓⲥ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ